«Жүректе – Отан, жырда – Мұқағали»

«Балдәурен» Республикалық оқу-сауықтыру орталығында «Жүректе – Отан, жырда – Мұқағали» атты челлендж бастау алды. Бұл ауқымды шараға орталықтың барлық филиалдары қатысты. Челлендж екінші ауысым қатысушыларын қазақ поэзиясының көрнекті өкілі Мұқағали Мақатаевтың шығармашылығын тереңірек танып-білуге бағыттайды.

Шараның басты мақсаты – жас ұрпақтың поэзияға деген қызығушылығын арттыру, отансүйгіштік рухын қалыптастыру және ұлттық әдебиетке деген құрметін нығайту. Қатысушылар ақынның өмірі мен шығармашылығы туралы білімдерін көрсетіп, өлеңдерін мәнерлеп оқып, әдеби-сазды композициялар мен сахналық қойылымдар ұсынады.

Мұқағали Мақатаевтың жырлары – шынайылығымен, туған жерге және елге деген шексіз сүйіспеншілігімен ерекшеленетін асыл мұра. Ақын поэзиясы әр буынның жүрегінен орын алған. Бұл челлендж жасөспірімдерге өз өнерлерін танытып, рухани дамуына серпін беретін маңызды бастама болды.